ABŞ Rusiya prezidenti Vladimir Putinin Ukrayna üzrə sülh danışıqlarının başlaması ilə bağlı şərtlərini yenidən rədd edərək, Moskvanın “ciddi və xoşniyyətli müzakirələrə hazır olmadığını” bildirib.

Dövlət Departamentinin sözçüsü Metyu Miller deyib ki, Putin daha bir maksimalist bəyanatla çıxış edərək, Ukraynanı danışıqlara başlamazdan əvvəl Rusiyanın indiyədək işğal etdiyi ərazilərdən başqa daha çox suveren ərazisini təslim etməyə çağırıb.

“Prezident Putin Rusiyanın gələcək təcavüzünə qarşı həssas olması üçün Ukraynanın tərksilah olmağa razılaşmasını tələb edib”, Miller deyib.

O bildirib ki, “heç bir məsul ölkə bunun sülh üçün ağlabatan əsas olduğunu deyə bilməz”.

“Bu, BMT Nizamnaməsinə ziddir. Bu, əxlaqın əsaslarına ziddir. Bu, sağlam düşüncəyə ziddir. Aydındır ki, Rusiya ciddi, vicdanlı müzakirələrə hazır deyil. Rusiyanın hərəkətləri bunu xüsusilə aydın göstərir. Çünki o, Ukraynanın əsas infrastrukturunu bombalamağa davam edir, Qara dənizdə gəmiçiliyi təhdid edir və on minlərlə ukraynalı uşağı zorla deportasiya edir”, Miller bildirib.

Millerin dediyinə görə, ABŞ Ukraynaya sarsılmaz dəstək verməyə davam edəcək.

O xatırladıb ki, keçən həftə ABŞ prezidenti Co Bayden və Ukrayna prezidenti Volodimir Zelenski ABŞ və Ukrayna arasında ikitərəfli təhlükəsizlik sazişi imzalayıb.

“Bu, Ukraynanın gələcəyini təmin etmək və onun Avro-Atlantik inteqrasiyasını, o cümlədən NATO ilə qarşılıqlı fəaliyyət qabiliyyətini dəstəkləmək üçün geniş, bir-birini gücləndirən və güclü ölkələr şəbəkəsi qurmaq sahəsində mühüm bir mərhələdir” - deyə, Miller bildirib.

O qeyd edib ki, ABŞ və Ukrayna bu sazişlə təhlükəsizlik və iqtisadiyyat sahəsində əməkdaşlığı inkişaf etdirmək, korrupsiya ilə mübarizəyə yardım və Rusiyanı məsuliyyətə cəlb etmək niyyətlərini bəyan edib.

"Biz həqiqətən ədalətli və davamlı sülh şəraiti yaratmaq üçün Ukrayna, onun tərəfdaşları və beynəlxalq ictimaiyyətlə işləməyə davam edəcəyik" - deyə, Dövlət Departamentinin sözçüsü bildirib.

"İkitərəfli təhlükəsizlik sazişi Ukrayna üçün davamlı sülhün dəstəklənməsi sahəsində daha geniş səylərin bir hissəsidir və prezident Baydenin dediyi kimi, bu, Ukraynanın özünü indi müdafiə etmək və gələcək təcavüzün qarşısını almaq qabiliyyətinin dəstəklənməsi deməkdir. Bu arada biz özünü Rusiyanın təcavüzündən müdafiə edən Ukraynanı və onun xalqını dəstəkləyəcəyik”, Miller bildirib.