Rusiyanın xarici işlər naziri Sergey Lavrov Azərbaycanın Moskvadakı yeni səfiri Rəhman Mustafayevə peşəkar fəaliyyətində uğurlar arzulayıb.

Bu barədə Rusiya Xarici İşlər Nazirliyinin saytında yerləşdirilən məlumatda deyilir.

“Oktyabrın 4-də Azərbaycan Respublikasının Rusiya Federasiyasına təyin olunmuş fövqəladə və səlahiyyətli səfiri Rəhman Mustafayev Rusiya Federasiyasının Xarici İşlər Naziri Sergey Lavrov tərəfindən qəbul edilib”, - məlumatda bildirilir.

Rusiya Xarici İşlər Nazirliyi əlavə edib ki, daha sonra Rusiya xarici işlər nazirinin müavini Mixail Qaluzin də Mustafayevlə görüşüb və görüş zamanı səfir ona etimadnaməsinin surətini verib:

“Söhbət zamanı Rusiya-Azərbaycan münasibətlərinin mütərəqqi inkişafı vurğulanıb, ikitərəfli gündəlikdəki bəzi aktual mövzular müzakirə edilib”.