Azərbaycanın Ermənistan tərəfindən işğal olunmuş ərazilərində işğalçı dövlətin qeyri-qanuni fəaliyyəti, o cümlədən məskunlaşdırma siyasəti davam etdirilir. Bu barədə Azərbaycan Xarici İşlər Nazirliyi və “Azərkosmos” ASC-nin yaydığı birgə məlumatda deyilir.
Bildirilib ki, “Azərkosmos” ASC-nin “Azersky” peyki vasitəsilə aparılmış monitorinqlər nəticəsində ölkəmizin işğal altındakı Kəlbəcər rayonunun ərazisində qeyri-qanuni yaşayış məskəninin salınması faktı öz təsdiqini tapıb.

2019-cu ilin sonlarından etibarən salınmağa başlamış bu yaşayış məskəni hazırda 15 evdən ibarətdir.
İnşaat işlərinin sürəti və gedişi bu yaşayış məskəninin daha da genişlənəcəyini deməyə əsas verir.

Ermənistanın növbəti məkrli siyasəti barədə “Sherg.az”a danışan hərbi ekspert Üzeyir Cəfərov bu addımların cavabsız qalmadığını söyləyib:

“ATƏT-in Minsk qrupu, həmçinin görünən və görünməyən qüvvələr buna şərait yaratdıqca, ermənilərin həyasızlıqları da davam edəcək. Amma çanaq öz başında çatlayacaq. Ermənistanın sərt cazalanacağı ilə bağlı şübhəm yoxdur.

Biz indiyədək kifayət qədər səbr göstərmişik. Hətta beynəlxalq qurumların sözünə inanaraq, bəlkə də, bir az gecikmişik.

Amma Azərbaycan bundan sonra güc amilindən istifadə edəcək. Çünki Ermənistan havadarlarına inanaraq, necə deyərlər, yetənə yetir, yetməyənə də daş atır. Düzdür, Ermənistanın arxasında duran qüvvələr var. Məsələn Tovuz döyüşləri zamanı Serbiya vasitəsilə düşməni silahlandırdılar.

Amma bu, davamlı olmayacaq. İndi hər kəsin başı öz qayğılarına qarışıb. Ermənistan isə kor öküz kimi kəllə vurmaqdadır. Azərbaycanın gücü Ermənistanla müqayisəyə gəlməyəcək qədər böyükdür. Odur ki, Ermənistanla bağlı ciddi addımlar atılmalıdır. Əks halda qərarı Azərbaycan verəcək”.


Paylaş: