İndiki məqamda qarşımızda duran əsas vəzifə Dağlıq Qarabağla bağlı həqiqətlərin dünya ictimaiyyətinə çatdırmaqdır. Bu işdə dövlətlə yanaşı vətəndaşlarımızın da üzərinə böyük vəzifə düşür. Düşmən ölkənin xalqımıza qarşı törətdiyi qətllər və mülki əhalimizin gülləbaran edilməsinin beynəlxalq aləmə çatdırılması vacibdir.
Yalnız ölkəmizdəki vətəndaşlar deyil, həmçinin xaricdə yaşayan soydaşlarımızın düşmənin iç üzü ilə bağlı apardığı təbliğatlar mühüm əhəmiyyət kəsb edir. Haqq səsimizin müxtəlif ölkələrə çatdırılması, geniş təbliğatların aparılması mənfur düşmənin simasını tanıtmaq üçün əsas vasitədir.

Bu işlərin görülməsində bəzi dövlət orqanları, eyni zamanda Diasporla İş üzrə Dövlət Komitəsinin effektiv və aktual fəaliyyəti lazımdır. Lakin son günlər ölkəmizdə baş verənlər və ermənilərin Gəncədə törətdiyi vəhşiliklərlə bağlı Diaspor Komitəsi passivlik göstərir.

Dünya ictimaiyyətinin Azərbaycanda baş verənlərdən xəbərdar olması, həqiqətləri duyması üçün Komitənin fəaliyyətinə ciddi ehtiyac olduğu zamanda bu passivlik heç də xoşagələn deyil.

Diaspor Komitəmizin effektiv işlər görməsinin vacib olduğunu deyən Azərbaycan Demokrat Partiyasının (ADP) sədri Sərdar Cəlaloğlu “Sherg.az”a bildirib ki, əvvəllər bütün dünya azərbaycanlıları ayağa qalxırdı, amma indi səs yoxdur.

Partiya sədri qeyd edib ki, bu dəqiqə xaricdə yaşayan azərbaycanlılar daim ayaq üstə olmalı, ermənilərin axmaq təbliğatlarını neytrallaşdırmalıdırlar:

“Diaspor Komitəmiz hazırda öz fəaliyyətini fərqli şəkildə qurmalıdır. Amma gözləyirlər ki, Prezident göstəriş versin, ondan sonra fəaliyyət göstərsinlər. Müstəqil düşünüb, çalışmaq gücündə deyillər”.

S.Cəlaloğlu vurğulayıb ki, Diaspor Komitəmiz Dağlıq Qarabağla bağlı gecə-gündüz ayaq üstə olmalı, dövlətin maraqlarını müdafiə etməlidir: “Lakin fəaliyyətlərini yarıtmaz qurublar. Ancaq tellərini daramaqla məşğuldurlar.

Dəfələrlə qeyd etmişəm ki, beynəlxalq ictimaiyyəti məlumatlandırmaq lazımdır, Azərbaycanın haqq işini dünyaya çatdırmalıyıq. Gəncə vurulub, amma xaricdəki bir dənə də Diasporumuz etiraz etmir.

Bütün bunlar Diasporla İş üzrə Dövlət Komitəsinin öz işinin öhdəsindən gəlmədiyini göstərir”.


Paylaş: