MDB ölkələrində ikinci inqilab dalğası başlayıb. Belarusda başlayan inqilabi proses Qırğızıstana keçid edib.

Növbədə isə Ermənistanın olacağı ehtimalı böyükdür. Bunu körükləyən isə Azərbaycanın döyüş meydanında Ermənistanı bütün parametlərdə üstələməsidir. Artıq Ermənistan cəmiyyəti Nikol Paşinyan iqtidarına qarşıdır və bu, bütün səviyyələrdə özünü göstərir.

Politoloq Cümşüd Nuriyev Cebhe.info-ya açıqlamasında Ermənistanda yaxın 1-2 həftə ərzində inqilabın baş verəcəyini deyib:

“Ermənistandakı Qərbin deyil, Rusiyanın hazırladığı inqilabdır. Çünki Belarusla Qırğızıstandakı etirazçılar Sorosun “uşaqlarıdır”. Onsuz da Qırğızıstanı elə öyrədiblər ki, 5 ildən bir inqilab etməsələr darıxırlar. Belarusda isə vəziyyət kifayət qədər gərgindir. Tixanovskaya Aleksandr Lukaşenkoya 4 gün vaxt vermişdi, artıq 1 gün keçib. Onlar Belarus əhalisinə müraciət ediblər ki, daxildən heç nə almasınlar, boykot sisteminə keçsinlər. Əmrlərin icra olunmaması, oturaq aksiyaların keçirilməsi qərara alınıb. Əslində bunlar hamısı Belarusu məhv etmək üçün plandır. Lukaşenko çalışır ki, Belarusu xilas etsin, amma Belarus batacaq”.

C.Nuriyev bildirir ki, Ermənistanda durum fərqlidir:

Paşinyan hakimiyyətə gələndən siyasi cəhətdən bizə daha çox işləyir. Çünki adamın bütün danışığı ancaq Ermənistanın əleyhinədir. Paşinyan küçədən hakimiyyətə gəlib. O, siyasətçi də deyil, 2 dəfə həbsdə yatıb. Paşinyan bizə çox “yaxşılıq etdi”. Bu “yaxşılıq” da ondan ibarətdir ki, Azərbaycan səviyyəsiz Paşinyanın təhqirlərinə artıq dözmədi. Amma təbii ki, Paşinyanı Rusiya istəmir. Çünki Paşinyanın əsas məqsədi Ermənistanı Rusiyanın nüfuz dairəsindən çıxarmaq idi. Bunun üçün isə Ermənistan üzərindəki ən ağır siyasi yükdən- Qarabağdan əl çəkməli idi. Paşinyan da bu addımı atdı. Yəni Paşinyan bütün dünyaya Ermənistanın haqsız olduğunu öz dili ilə sübut etdi. Ermənistanın bütün siyasi dayaqlarını sarsıtdı. Bu mənada, Paşinyan bizə “xidmət etdi”. Amma əslində Azərbaycan uzun zaman idi ki, Qarabağ məsələsini həll etmək istəyirdi. İndi artıq Qarabağ məsələsi demək olar ki, həll olunub. Paşinyan dünən yenə bəyanat verdi ki, Qarabağ məsələsinin diplomatik həlli yoxdur, hamını silahlanmaya çağırdı. Bu, “Qarabağ klanı” ilə Ermənistan arasında çox dərin bir uçurum yaratdı”.

Politoloq əlavə edib ki, Ermənistanda inqilab istisna deyil, amma bundan əlavə Paşinyan öldürülə də bilər:

“Çünki həm ASALA, həm də “Daşnaksütyun” Paşinyanı hədələyir. Hətta Paşinyana qarşı terror aktı törədəcəklərini deyirlər. Düzdür, Paşinyan qorxaqdır, amma həm də çox hiyləgərdir, yaxşı müəllimləri var. O, Ermənistan daxilindəki qarşıdurmalardan yararlanmağa çalışır. Amma inqilabın baş verməsi gözlənilir. Azərbaycan Şuşaya bayrağını taxan gündən sonra bir həftə ərzində Paşinyanı hakimiyyətdən yıxacaqlar. Düşünürəm ki, bu məsələ də yaxın 1 həftə ərzində baş verəcək”.


Paylaş: