Ermənistanın Azərbaycanla həmsərhəd Sünik vilayətinin sakinləri Baş nazir Nikol Paşinyanın bu əraziyə səfərinə mane olmaq məqsədilə yolu bağlayıblar. Bu barədə “News.am” saytı məlumat yayıb.

Qeyd edək ki, Daha əvvəl N.Paşinyan öz “Facebook” səhifəsində Sünik vilayətinə səfər edəcəyini, Mehri, Qoris, Qapan, Sisian şəhərinin əhalisi ilə görüşəcəyini açıqlamışdı.
Sərhədlərin demarkasiyası nəticəsində Ermənistanın işğal illərində çəkdiyi və Sünikin bir neçə kəndini birləşdirən yolun bəzi hissələri Azərbaycanın nəzarətinə keçir.

Məlumata görə, bu yolda təhlükəsizliyi Azərbaycan, Rusiya və Ermənistan sərhədçiləri təmin edəcək.
Artıq məlum olduğu kimi, bu hadisə Ermənistandakı xaotik vəziyyəti daha da mürəkkəbləşdirib. Hakmiyyət və müxalifət nümayəndələri sanki eyni “kəndir”i ayrı-ayrı istiqamətlərə çəkirlər. Belə getsə, olan “kəndir”ə olacaq…

Rusiyada yaşayan soydaşımız, politoloq, jurnalist Anar Həsənov Sünik məsələsinə dair “Sherg.az”a açıqlamasında oranın Azərbaycan torpaqları olduğunu nəzərə çatdırıb:

“İlk növbədə deyim ki, Sünik Qafqaz Albaniyasının əyalətlərindən biri olub və adın Ermənistanla heç bir aidiyyəti yoxdur. Azərbaycanın Ermənistan sərhədlərindən o tərəfə bir addım da atmadığını əminliklə söyləyə bilərik. Biz sadəcə 1991-ci ildən etibarən pozulmuş, amma tarixən, qanunla və beynəlxalq hüquqla tanınan ərazi bütövlüyümüzü bərpa edirik.

Əgər düşmən 1991-ci ildən sonra Zəngilanın bir neçə kəndini işğal edərək Qafana və ya özünün dediyi kimi, Sünikə birləşdiribsə, bu nə bizim, nə də beynəlxalq hüququn problemidir. Yeganə günahkar Ermənistan özüdür”.

A.Həsənovun fikrincə, tərəflər arasında sərhəd problemi yaxın zamanda həllini tapmalıdır:

“Ermənistanda məsələnin ictimailəşdirilməsi və kütləvi narazılıqla qarşılanması siyasi böhrandan xəbər verir. Ölkədə hakimiyyət uğrunda mübarizə gedir. Paşinyan qarşıya qoyulan tələbi yerinə yetirməyə çalışır. Müxalifət, xüsusilə qaragüruhçular isə bunu xəyanət kimi qiymətləndirirlər. Təkrarlamaq istəyirəm, biz təcavüz etmir, torpaqlarımızı geri qaytarırıq.

Üstəlik, bu, noyabrın 10-da imzalanan bəyanata da uyğundur. Həmin sənəddə göstərilib ki, mübahisəli torpaqların taleyi həll edilməlidir. Bu, gələcəkdə humanitar-iqtisadi layihələrin uğurla reallaşması üçündür.

Düzdür, tərəflər hələ ki, sülhdən çox, müharibəyə kapital xərcləyirlər. Lakin yaxın gələcəkdə regionda sabitliyin təmin olunması barədə icmarıclar səslənməkdədir.

Həmçinin Türkiyə prezidenti Rəcəb Tayyib Ərdoğanın haqqında danışdığı 6-lıq layihə də bunu işarədir. Yəni proses mərhələli həll tələb edir. İlk mərhələlərdən biri isə dediyim kimi, sərhədlərin bərpasıdır”.


Paylaş: