Mədəniyyət naziri postuna təyinat baş tutandan sonra sənətçilərin bu sahədən gözləntiləri də artıb. Sənət adamlarının fəxri ad problemlərini müzakirə etdiyi bir vaxtda Xalq artisti Şeyx Əbdül Mahmudbəyov diqqəti daha mühüm məsələyə çəkib.

Yenisabah.az-a danışan kinorejissor Rusiya Dövlət Dumasının hakim “Vahid Rusiya” Partiyasından olan üzvü Vitaliy Milonovun Rusiya telekanalında Azərbaycan dövlətinə və xalqına qarşı qəbuledilməz ifadələr işlətməsini qəti şəkildə pisləyib:
“Bizim nəsil min illərdir bu torpaqlarda yaşayır. Mən sənət adamıyam, topum-tüfəngim yoxdur, ideologiya, təbliğat adamıyam. Bu gün mənim xalqıma, müqəddəs torpağıma daş atan, muzdlu xəyanət edən, satın alınmış rəzillərin xalqım, dövlətim haqqında dediyi sözlərə heç cür sakit otura, dözə bilmərəm! Bir neçə gün əvvəl vahid Rusiya partiyasından deputat olan, dumanın üzvü Vitaliy Milonov ölkəmiz haqqında bəzi sözlər işlətdi. O, “Pozisiya” verilişinə çıxaraq bütün dünyaya qəribə bir mesaj göndərib. Deputat deyib ki, “biz başa düşmürük ki, vəhşi azərbaycanlılar dünya əxlaqı, insanlığa, bəşəriyyətə böyük töhfələr verən qədim və böyük erməni xalqından nə istəyir? Niyə onları qırır, məhv edirlər? Torpaqlarını əllərindən alıb, dünyanın demoqrafiq xəritəsini silah gücünə dəyişirlər”.

Xalq artisti qatı ermənipərəst mövqeyi ilə tanınan Vitaliy Milonovun Azərbaycan əleyhinə atdığı növbəti təxribatçı addımı sərt qınayaraq onu satılmış adlandırıb:

“V.Milonov efirdən bütün dünyaya bu sözləri dedi. Mən ikinci təhsilimi Moskvada almışam, illərlə orada yaşamışam. Mən rus xalqını çox gözəl tanıyıram, Moskvada 1 saatlıq kənara çıxırsan görürsən ki, ruslar it günündə yaşayırlar. Televziyaya, internetə baxsanız görəcəksiniz, qazları, işıqları yoxdur, pis gündə, dəhşətli şəraitdə yaşayırlar. Mən əsl rus xalqının mənəviyyatını, əxlaqını bildiyim üçün yüzdə yüz əminəm ki, bu sözləri deyənlər, ermənilərə satılanlar rus xalqına aidiyyatı olmayan tullantılardır. Onlar satılmış, aldadılmış kəvakiblərdir. Hamıya aydındır ki, ermənilər 200 ildir rus xalqından necə məharətlə istifadə edirlər. Onlar bütün dünyanı aldadır, elm adamlarını, tarixçiləri satın alırlar. Dünyanı bu yolla aldadırlar. Bizi bax belə sıxışdırırlar. Onlar insanları o qədər aldadıblar ki, hətta dünyada erməni vəhşiliyini göstərəndə, təəccüblənirlər ki, yəni bunları doğurdanmı ermənilər edib?

Mən ağsaqqal Azərbaycan kişisi kimi, türk oğlu kimi çox narahatam. Bütün dünya bilməlidir ki, bura bizim vətənimizdir, biz min illərdir buradayıq. Azərbaycan yağlı bir tikədir, ermənilər də bunu bilərək bizim humanistliyimizdən istifadə etdilər. 200 il sonra gəlib belə üzümüzə durdular. Onlar ciddi şəkildə öz təxribatçı ideologiyalarını yayırlar.

Mənim Vitaliy Milonovdan tələbim budur ki, çıxış etdiyi “Pozisiya” verilişində rəsmi surətdə Azərbaycan xalqından, dövlətindən üzr istəsin! Əks təqdirdə, biz Azərbaycan xalqı adından onu beynəlxalq məhkəməyə verəcəyik”.

Ə.Mahmudbəyov Azərbaycan parlamentinin üzvlərinin, siyasi partiyaların bu mövzuda səssiz qalmasına da etiraz edib:

“Biz bu məsələyə səsimizi qaldırmalıyıq. Mən Milli Məclisin Təbii ehtiyatlar, energetika və ekologiya komitəsinin üzvü, Azərbaycan Rus İcmasının rəhbəri Mixail Zabelinə səslənirəm, o həmin rus deputata xalqın və rus icmasının adından rəsmi müraciət etməlidir. Həmin deputat ciddi şəkildə cəzasını almalıdır, Rusiya Dövlət Duması bu tip şeylərə xitam verməlidir. Vladimir Jirinovski kimi şərəfsizlər də bizim ünvanımıza tez-tez xoruz kimi banlayırlar. Onlar bilmir ki, vaxtsız banlayan xoruzun gec-tez başı kəsilir. Biz artıq əvvəlki xalq deyilik, ayılmışıq. Bizim alimlər, məmurlar bu məsələyə diqqət yetirməlidirlər. Bizim parlamentimiz, siyasi partiyalarımız hara baxır?! Nə ilə məşğuldurlar? Oturduqları kreslolardan, villalardan bu xalqı müdafiə etsinlər!”


Paylaş: