"İrəvanın sərhəddəki bu təxribatı Moskva-Ankara əməkdaşlığında çat yaratmağa hesablanıb”.

Bu sözləri Sfera.az-a açıqlamasında Ermənistanın Qazaxla sərhəddə növbəti təxribata əl ataraq atəşkəsi pozmasının arxasında hansı məqsədlərin dayandığına aydınlıq gətirərkən politoloq İlqar Vəlizadə deyib:

"Düşmən bu təxribatlarla müharibənin heç də bitmədiyini, nə vaxtsa bərpa oluna biləcəyini göstərmək istəyir. Qarabağ istiqamətində cəbhə yoxdur, sabitlik hökm sürür, orada rus sülhməramlıları fəaliyyət göstərir. Buna görə də erməni tərəfi Qarabağ istiqamətində atəşkəsə əməl etməyə məcburdur. Amma təəssüf ki, sərhəd zonasında gərginlik yaşanır. Bu təxribat əməlləri onu göstərir ki, Ermənistan rəhbərliyi revanşist ovqatdadır və İrəvan bu siyasətindən öz xoşuna əl çəkən deyil. Azərbaycan tərəfi prosesə reaksiya verərək, Ermənistana təzyiq göstərməlidir”.

İ. Vəlizadənin fikrincə, bu əməllərilə ermənilər sərhəddə həyata keçirilən demarkasiya işlərinə əngəl törətməyi planlaya bilərlər: "Ermənistan - Azərbaycan sərhədi boyu demarkasiya prosesi gedir. O cümlədən, Qazaxın işğal altındakı yeddi kəndi Azərbaycana qaytarılmalıdır. Güman ki, ermənilər də bu işlərə əngəl törətmək üçün belə təxribatlara əl atırlar. Bir neçə gün əvvəl Monitorinq Mərkəzi fəaliyyətə başlayıb. Ola bilsin, İrəvanın bu təxribatı Rusiya - Türkiyə əməkdaşlığında gərginlik yaratmağa hesablanmış addımdır”.


Paylaş: