“NATO Qara dəniz bölgəsindəki varlığını gücləndirdi. Üç sahil ölkəsi - Türkiyə, Rumıniya, Bolqarıstan - NATO üzvüdür, ikisi - Ukrayna və Gürcüstan - NATO-nun yaxın tərəfdaşlarıdır. Müttəfiqlərimizlə quruda, suda və havada varlığımızı gücləndirdik, eyni zamanda Gürcüstan və Ukraynadakı tərəfdaşlarımızla əməkdaşlığımızı genişləndiririk. Bunu davam etdirəcəyik və bu tərəfdaşlığı siyasi və praktik dəstəklə daha da genişləndirəcəyimizi düşünürük. ”

Ovqat.com xəbər verir ki, bu sözləri NATO-nun Baş katibi Yens Stoltenberg dünən alyansın Brüsseldəki qərargahında keçirdiyi mətbuat konfransında jurnalistlərin suallarına cavablandırarkən deyib.

NATO ölkələrinin Xarici İşlər nazirlərinin dünənki toplantısı Rusiyanın qonşu ölkələrə təcavüzkar hərəkətlərini “cilovlamağa” həsr olunmuşdu. Görüşdə müttəfiqlərlə yanaşı Finlandiya və İsveçin Xarici İşlər nazirləri, habelə Aİ-nin Ali nümayəndəsi Josep Borrell də iştirak edirdi.

Toplantıdan sonra keçirilən mətbuat konfransında çıxış edən Stoltenberg jurnalistlərin suallarını cavablandırarkən alyansın Rusiya ilə bağlı 10 illik strategiyasına aydınlıq gətirib. O, Şimali Atlantika İttifaqının Qara dəniz bölgəsindəki mövcudluğunu gücləndirdiyini, bunun da Ukrayna, Moldova və Gürcüstanla əməkdaşlığı asanlaşdıracağını deyib. Stoltenberg xarici işlər nazirliklərinin rəhbərlərinin diqqətini NATO-nun tərəfdaşları ilə əməkdaşlığı gücləndirərək "Rusiyaya açıq siqnal verməyə" yönəldib. Baş katibin fikrincə, tərəfdaş ölkələrlə əlaqələrin gücləndirilməsi "NATO-2030" strateji konsepsiyasının əsas istiqamətlərdən biridir.

Qara dəniz bölgəsinin təhlükəsizliyinin alyans üçün prioritet təşkil etdiyini vurğulayan Stoltenbergin fikrincə, müttəfiqlərin Rusiyanın güclənməsindən qaynaqlanan narahatlığını yalnız NATO-nun regionda əməkdaşlıqları artırmaqla aradan qaldırmaq mümkündür.

Stoltenberg həmçinin, Rusiyanı həm ölkə daxilində, həm də xaricində aqressiv siyasət yürütməkdə günahlandırıb və siyasi blogger Navalninin dərhal azadlığa buraxılmasını tələb edib.

NATO-nun Baş katibinin Xarici İşlər nazirlərinin toplantısından sonra keçirdiyi mətbuat konfransındakı çıxışının tam mətnini təqdim edirik:

“NATO ölkələrinin xarici işlər nazirləri Rusiya ilə bağlı diskussiyanı yenicə başa vurublar.

Finlandiya və İsveçin kimi yaxın tərəfdaşlarımız, həmçinin Avropa İttifaqının ali nümayəndəsi və Avropa Komissiyası sədrinin müavini Borrel də bizə qoşulublar.

Rusiya ilə münasibətlərimiz çox mürəkkəb olsa da, bizim bugünkü görüşümüz müttəfiqlərlə, tərəfdaşlarımızla möhkəm əlaqələrimizi nümayiş etdirir.

Rusiyanın konstruktiv dialoqa cəlb edilməsi istiqamətində uzun illər davam edən təzyiqlərə və səylərə baxmayaraq, Moskva hələ də ölkə daxilində repressiv davranışın və öz hüdudlarından kənarda təcavüzkarlıq modelini gücləndirir. Biz hələ də Rusiyada siyasi fərqli düşüncənin qəddar yatırılmasını müşahidə edirik. Və biz Rusiyanı Aleksey Navalnini və dinc nümayişlərdə həbs edilmiş digər iştirakçılarını dərhal azad etməyə çağırırıq.

Xaricdə Rusiya Ukrayna, Gürcüstan və Moldova Respublikası da daxil olmaqla, qonşu ölkələrdə pozğunluq və sabitliyin pozulması istiqamətində fəaliyyət göstərir. O, Belarusdakı repressiv tədbirləri dəstəkləyir və Qərbi Balkan bölgəsinə müdaxilə etməyə çalışır.

Rusiya hərbi gücünü geniş miqyasda artırmağa davam edir: Baltik dənizindən Qara dənizə, Yaxın Şərqdən Şimali Afrikaya, Aralıq dənizindən Arktikaya qədər.

NATO ölkələri bu toplantıda Rusiyanın həyata keçirdiyi dezinformasiyaya və təbliğata, seçkilərə, kiberhücumlara təsir göstərmək və həm öz ərazisində, həm də bizim ərazimizdə siyasi rəqiblərə qarşı kimyəvi silahdan istifadə etmək cəhdlərinə qarşı çıxmışlar. NATO-nun reaksiyası möhkəm və ardıcıldır, belə olmağa da davam edəcək.

Rusiyanın hərəkətlərinə cavab olaraq, NATO kollektiv müdafiənin son nəsillərini möhkəmləndirmək siyasəti həyata keçirib.

Biz hibrid və kiber hücumlara qarşı mühafizəmizi gücləndirmişik və bu sayıqlığı saxlayacağıq. Biz Rusiyanın hərəkətlərinə birgə reaksiya vermək üçün Aİ və yaxın tərəfdaşlarımızla işləməyə davam edəcəyik.

Müttəfiqlər razılaşırlar ki, biz geri baxmağı və müdafiə tədbirlərini gücləndirməyə davam etdirməliyik. Söhbət həm də Rusiyanın artan raket təhlükəsindən gedir.

Bizi ikili yanaşma - dialoqa açıqlıq ilə güclü müqavimət və müdafiə əzmi birləşdirir.

Bütün müttəfiqlər nüvə silahlarına nəzarət etmək üçün öz üzərlərinə möhkəm öhdəliklər götürürlər. Və bütün müttəfiqlər START (strateji hücum silahlarının azaldılması və məhdudlaşdırılması tədbirləri haqqında – Ovqat.com) müqaviləsinin uzatmaq üçün son qərarı alqışlayırlar. Bu, nüvə silahlarına beynəlxalq nəzarətin daha da gücləndirilməsi üçün səylərin başlanğıcı olmalıdır.

Amma biz görürük ki, Rusiya yeni və sabitliyi pozan nüvə silahlarını genişləndirməkdə davam edir. Bizə elə sazişlər lazımdır ki, bu sazişlər Çin kimi daha çox ölkələri də əhatə etsin. Ona görə də silahlara nəzarət rejimi yeni reallıqları da nəzərə almalıdır.

NATO silahlara nəzarət, tərksilah və onların yayılmaması üçün möhkəm və uzunmüddətli öhdəliklərə sadiqdir və biz gələcəkdə silahlanmaya nəzarət üzrə Avropa və Şimali Amerikanın məsləhətləşmələri üçün unikal platforma olaraq qalırıq. Çünki bu, dünyanı qorumağa kömək edir.

İndi isə suallarınıza cavab verməyə hazıram”. (Mətnin tərcüməsi Ovqat.com-a aiddir)


Paylaş: