Rusiyanın tanınmış jurnalisti və televiziya aparıcısı Vladimir Pozner Ermənistanın İctimai Televiziyasına müsahibə verib. O, müsahibəsində son dəfə bu ölkədə 2015-ci ildə olduğunu və nə o vaxt, nə də indi Qarabağa getməyə macal tapmadığından təəssüfləndiyini bildirib.

"Təəssüf ki, mən Dağlıq Qarabağda olmamışam. Məmnuniyyətlə gedərdim, amma vaxtım yoxdur. Heç olmasa, öz mövqeyimi bildirmək üçün oraya gedərdim ki, hamı, o cümlədən cənab azərbaycanlılar başa düşsünlər ki, mənim ürəyim bu tərəfdədir, o tərəfdə deyil. Azərbaycanın "qara siyahı" adlandırdığı siyahı isə yalnız gülüş doğurur. Qoy məni "qara siyahıya" daxil etsinlər. Düşünürəm ki, gecə rahat yatmağa davam edəcəyəm".

Azərbaycana nifrətlə dolu bu müsahibənin dünən Azərbaycanın Respublika günündə yayımlanması yalnız erməni xislətindən irəli gəlir.

Görünür, Pozner bu sözləri erməni konyakının təsirindən sonra deyib. Yəqin o təsir itəndən sonra belə fikri demədiyini açılayacaq. Bəlkə yox, elə dediyini bir daha təkrar edəcək. Burada isə təəccüblü heç nə yoxdur.

Azərbaycanı istəməyən, onun uğurlarına sevinməyən "məşhurlar" təkcə Rusiyada deyil, bir sıra məmləkətlərdə də var və gizli deyil ki, onların hamısı erməni lobbisinin qucağında oturub.

Artıq dünəndən başlayaraq sosial şəbəkələrdə Poznerin bu müsahibəsinə təpkilər gəlir və onun mövqeyi sərt formada tənqid edilir.

Rusiyanın paytaxtı Moskva şəhərində yaşayan tanınmış azərbaycanlı jurnalist Anar Həsənov da özünün "Facebook" səhifəsində “Jurnalist Vladimir Poznerin bəyanatı haqqında bir neçə söz” başlıqlı status yazıb.

"Vladimir Pozner Yerevanda erməni telekanalına verdiyi müsahibəsində onun mövqeyinin vətəndaşı olan ölkənin mövqeyindən fərqləndiyini bildirib.

Başqa sözlə, o hesab etmir ki, Qarabağ və onun ətrafındakı 7 rayon de-yure Azərbaycana məxsusdur. Yeri gəlmişkən, yaşlı jurnalistin ifadə etdiyi subyektiv fikir heç bir halda çalışdığı telekanalla bağlı deyil.

O, ORT-nin və rəsmi Moskvanın fikirlərini bölüşmədi, sadəcə ermənilərə öz rəğbətini ifadə etdi. Odur ki, Rusiyanın düşmənlərinin sakitləşməyini xahiş edirəm, çünki ura-vətənpərvərlik Azərbaycan-Rusiya münasibətlərinə xeyli ziyan vurub.

Bəli, təəssüf. Vladimir Vladimiroviç ictimai rəyin formalaşmasında mühüm rol oynayır. O, Rusiya jurnalistikasının komandiri sayıla bilər, lakin bu, o demək deyil ki, o, konfliktologiya üzrə alimdir. Onun bəyanatı emosional rəngdədir və oradan İrəvan konyakının iyi gəlir.

Qocaman jurnalist 85 yaşında beynəlxalq hüquqa zidd olan bəyanatı ilə yadda qalıb. Sizin sevimli və ağıllı erməniləriniz tərəfindən Xocalıda 613 dinc sakin vəhşicəsinə qətlə yetirildi, bir milyon azərbaycanlı öz vətənindən qovuldu.

Elm həmişə fövqəlmilli olub, bizə öyrədiblər ki, taleyüklü məsələlərdən danışarkən jurnalistika da məsuliyyət daşımalıdır. Vladimir Vladimiroviç bu meyarlara əməl etmədi, ya yaş artıq öz təsirini göstərdi.

O, erməni xalqını belə hədsiz məhəbbətləmi sevir?

Lakin fakt inadkar şeydir, çox qərəzli və təxribatçı mövqe onun sözlərindən sezilirdi. Bəlkə də Poznerin qrupların, şəxslərin, hətta xalqların rəğbətinə ehtiyacı yoxdur. Lakin onun beynəlxalq hüquqa zidd olan və hörmətsizlik çağırışını özündə əks etdirən qeyri-dost bəyanatının kimə hesablandığı təəssüf doğurur".
AzNews.az


Paylaş: