"Lavrov Azərbaycana səfəri zamanı əsasən təxribat məqsədilə Azərbaycana göndərilmiş 62 nəfərin Ermənistana qaytarılması məsələsini aktiv müzakirə edəcək".

Bunu Sfera.az-a açıqlamasında politoloq Qabil Hüseynli bildirib. O, səfər zamanı bir çox məsələlərin həllini tapa biləcəyini qeyd edib:

"Lavrovun Ermənistana da səfər etməsi insanda elə təəssürat oyadır ki, həm də kommunikasiyaların açılması məsələsi gündəmdə olacaq. Lavrovun səfəri bütövlükdə problemlərin həllində müəyyən rol oynayacaq. Bu problemlərin isə içərisində birinci yerdə kommunikasiya məsələsi yer alır. Hazırda ermənilər Zəngəzur dəhlizinin açılmasını protesto edirlər. Ermənistan hakimiyyət orqanları isə seçki ərəfəsi olduğu üçün vətəndaşa bu istiqamətdə basqı etmir. Bundan başqa Gümrü-Qars dəmiryolu, sərhədlərin açılması kimi problemlər də müzakirə oluna bilər. Müzakirə dedikdə, Azərbaycan Lavrovdan və Ermənistandan tələb edəcək ki, 10 noyabr sazişində əks olunan belə məsələlər tezliklə həllini tapsın".

Müsahibimiz yaxın vaxtlarda Qazaxın işğalda olan kəndlərinin də qaytarılacağını diqqətə çatdırıb:

"Qazaxın işğalda olan 7 kəndinin qaytarılması məsələsi də Lavrovun gəlişi zamanı müzakirə olunmalıdır. Bu kəndlərin yaxın zaman ərzində qaytarılması real görünür. Əgər Ermənistanla Zəngəzur bölgəsində sərhədləri demarkasiya edərkən orada olan bir kənd, yol Azərbaycan ərazisinə keçirsə, o zaman həmin 7 kəndin Azəraycanın nəzarətinə keçməsi labüd görünür. Erməni tərəfi kəndlərin qaytarılmasında maneə yaradarsa, o zaman Azərbaycan ordusu hərəkətə keçib kəndləri nəzarət altına alacaq".


Paylaş: