Türkiyə prezidenti Rəcəb Tayyib Ərdoğan gələcək həftələrdə Azərbaycana gələcək. Bu barədə Türkiyənin mədəniyyət və turizm naziri Mehmet Nuri Ersoy məlumat verib. O, bildirib ki, bu günlərdə Azərbaycan və Türkiyə Prezidentləri səviyyəsində, işğaldan azad edilmiş Azərbaycan ərazilərində yenidənqurma və restavrasiya işlərinin necə planlaşdırılması haqqında müzakirələr gedir.

“Bu torpaqlarda infrastruktur və yenidənqurma işləri ilə yanaşı mədəni, tarixi əhəmiyyətə malik abidələrin, arxeoloji yerlərin restavrasiyası da ön plandadır. Türkiyə Prezidenti Rəcəb Tayyib Ərdoğanın qarşıdakı həftələrdə Azərbaycana edəcəyi səfərdən sonra, bizim də Qarabağın yenidənqurulması və restavrasiyası ilə bağlı fəaliyyətimiz intensivləşəcək. Ən qısa müddətdə qeyd etdiyim mədəni, tarixi abidələrin bərpası, qorunması bölgədə turizmin inkişafına da təkan verəcək”.- deyə, nazir əlavə edib.

Ağ partiya sədrinin müavini, politoloq Əhəd Məmmədli “Sherg.az”a açıqlamasında səfərin əhəmiyyətini yüksək qiymətləndirdi:

“Ərdoğan Şuşaya gələcək ilk xarici ölkə lideri olacaq. Bu, Türkiyənin regionun əsas iştirakçılarından, başlıca söz sahiblərindən biri olduğunu göstərir. Niyə, Putin, Makron, Ruhani yox, məhz Ərdoğan?! Bax, bu sualın cavabı həm də beynəlxalq əhəmiyyətli mesajdır. Deməli, bundan sonra da kimsə revanşist ideyalara qapılmamalıdır”.


Paylaş: