Rusiyanın Vaşinqtondakı səfirliyinin nazir-müşavirinin əsassız olaraq ölkədən çıxarılmasına cavab olaraq ABŞ-ın Moskvadakı səfirinin müavini Bart Qormana Rusiyanı tərk etmək əmri verilib. 

Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova məlumat verib. "ABŞ Diplomatik Nümayəndəliyinin rəhbərinin müavini Bart Qormanın Moskvanı tərk etməsi ilə bağlı vəziyyətə aydınlıq gətirmək istərdik. Bu, bəzi KİV-lərdə az qala Rusiya tərəfinin qəsdən eskalasiyası kimi təqdim olunur. ABŞ-lı diplomata həqiqətən də Rusiyanı tərk etmək əmri verilib. Buna səbəb Vaşinqtondakı səfirliyimizin müşaviri yüksək vəzifəli məmur statusuna baxmayaraq əsassız olaraq ölkədən çıxarılmasıdır”-deyə Zaxarova bildirib.