Azərbaycan və Rusiya prezidentləri İlham Əliyev və Vladimir Putin arasında görüş keçiriləcək.

Bu barədə Kreml məlumat yayıb.

Qeyd olunub ki, fevralın 22-də Prezident Vladimir Putin Rusiyada rəsmi səfərdə olacaq Azərbaycan Prezidenti İlham Əliyevlə danışıqlar aparacaq. Görüşdə siyasi, ticari-iqtisadi və humanitar sahələrdə ikitərəfli münasibətlərin gələcək inkişafı ilə bağlı kompleks məsələlərin müzakirəsi planlaşdırılır.

Bundan başqa, Rusiya, Azərbaycan və Ermənistan liderləri arasında Dağlıq Qarabağa dair 9 noyabr 2020-ci il, 11 yanvar və 26 noyabr 2021-ci il tarixli sazişlərin, o cümlədən Cənubi Qafqazda iqtisadi və nəqliyyat əlaqələrinin bərpası ilə bağlı tədbirlərin həyata keçirilməsi məsələlərinin müzakirəsi nəzərdə tutulur.

Danışıqların yekunu olaraq Rusiya ilə Azərbaycan arasında münasibətləri müttəfiqlik səviyyəsinə çatdıran Müttəfiq Əməkdaşlıq Bəyannaməsi imzalanacaq.