“Ermənistanın baş naziri Nikol Paşinyanın Rusiya Prezidenti Vladimir Putinə zəng etməsi Azərbaycanın mövqeyini dəyişdirə bilməz. Azərbaycan beynəlxalq hüququn norma və prinsiplərini pozmur. Biz öz ərazi bütövlüyümüzü bərpa edib suverenliyimizi qorumağa çalışırıq. Azərbaycan BMT tərəfindən tanınmış ərazisində anti-terror əməliyyatı, qoşunların yerdəyişməsi və s. kimi tədbirlər həyata keçirə bilər. Bunun üçün Azərbaycanın kiminləsə razılaşdırma aparmasına ehtiyac yoxdur”. Bunu Pravda.az-a açıqlamasında Milli Məclisin deputatı Arzu Nağıyev deyib.

Qarabağda müvəqqəti yerləşdirilən sülhməramlı kontingentin fəaliyyətinə gəldikdə isə, deputat bildirib ki, onlar manatlarına uyğun olaraq atəş açmamalı və münaqişə tərəflərinin arasında durmalıdırlar: “2020-ci 10 noyabr sazişində 3 dövlət başçısının imzası yer alıb, yəni hər bir lider öz imzasına hörmət etməlidir. Sənəddə konkret olaraq göstərilib ki, ərazidə olan qeyri-qanuni silahlı birləşmələr oranı tərk etməlidir. Əgər belədirsə, həmin tör-töküntü separatçı qüvvələr niyə ərazini tərk etmir?! Deməli, Ermənistanın məramı və məqsədi başqadır. Onlar qaz kəmərinin partlaması bəhanəsi ilə müəyyən humanizm məsələlərini qabardır, Azərbaycanı ittiham edirlər. Həmçinin separatçı qüvvələrin və qondarma rejimin mövcudluğu üçün diaspor təşkilatlarından vəsaitlər alırlar. Ermənistan Azərbaycanın sülh sazişi ilə bağlı 5 maddədən ibarət təkliflər paketinə riayət etmək istəmir. İstənilən halda, mövcud proseslər təkcə Xankəndi ilə bağlı deyil. Ümumiyyətlə, vaxtilə BMT-nin qətnamələri sülh yolu ilə həll olunmadığı kimi, indi bu məsələlər də hərbi yolla həllini tapa bilər. Ermənistan bunu yaxşı bilir. Bu qədər vaxt keçsə də, onlar nə mina xəritələrini doğru-düzgün verdilər, nə də digər şərtlərə əməl etdilər. Əgər Ermənistan sülhün bərqərar olmasını istəyirsə, təxribatçı addımlar atmamalıdır. Azərbaycan, əlbəttə ki, öz suveren ərazilərində nəzarətini tam gücləndirəcək, suverenliyini istər Xocalı, istərsə də Xankəndidə bərpa edəcək. Paşinyanın kimə zəng etməsindən, havadarlarından necə dəstək istəməsindən asılı olmayaraq, Azərbaycan bu problemi əvvəl-axır həll edəcək”.