“Kreml Qarabağla bağlı emosional bəyanatlardan çəkinməyə çağırır, Moskva vəziyyəti normallaşdırmaq üçün səy göstərir”.

Bu sözləri Rusiya Prezidentinin mətbuat katibi Dmitri Peskov Rusiya Dövlət Dumasının İqtisadi Siyasət üzrə Komitəsinin sədr müavini Mixail Delyaginin Azərbaycanla bağlı açıqlamalarına münasibət bildirərkən deyib.

“Bu bəyanat heç bir halda Rusiya Federasiyasının rəsmi xəttinə uyğun gəlmir və uyğunlaşa da bilməz. Bu, daha çox şəxsi emosiyalar müstəvisində yatan bəyanatdır. Əlbəttə, biz xüsusilə Azərbaycanın tərəfdaş ölkələr kateqoriyasına aid olduğu və daha çox Rusiyanın Qarabağ bölgəsində sülhün qorunması, bütün tərəflərin müvafiq öhdəliklərinin yerinə yetirilməsi üçün çox enerjili səylər göstərdiyi bir şəraitdə bu emosiyaları cilovlamağa və bu cür bəyanatlardan çəkinməyə çağırırıq”, - Peskov jurnalistlərə bildirib.

Qeyd edək ki, Rusiya Dövlət Dumasının İqtisadi Siyasət üzrə Komitəsinin sədr müavini Mixail Delyagin Azərbaycan Müdafiə Nazirliyinin Rusiya Müdafiə Nazirliyinə verdiyi rəsmi cavabları real təhlükə adlandırıb. Deputat dövlət televiziyasında çıxışı zamanı Azərbaycanı hədələyib və açıq şəkidə sülhü pozmaqda təqsirləndirib.