“Rusiya diktatoru Vladimir Putin heç bir strateji məqsədə nail ola bilmədi. Eyni zamanda, Ukrayna yaxşı nəticələr göstərir və müharibədə qalib gələ bilər”.

BBC- xəbər verir ki, bu sözləri Pentaqon sözçüsü Con Kirbi brifinq zamanı deyib.

"Əlbəttə, ukraynalıların artıq əldə etdiklərinə diqqətlə baxsanız, qalib gələ bilərlər. Putin Ukraynada heç bir strateji məqsədə nail ola bilməyib", - Kirbi bildirib.

Pentaqonun sözçüsü vurğulayıb ki, Putin hələ də Kiyevi almayıb, hökuməti devirməyib və bir aydan çox davam edən hərbi əməliyyatlar ərzində Rusiya Federasiyası Ukrayna ərazisinin yalnız kiçik bir hissəsinə nəzarət edir:

"Mariupol hələ alınmayıb. O, qoşunlarını Kiyevdən çıxarıb. Qoşunlarını Çerniqovdan çıxarıb. Xarkov alınmayıb. Onlar cənubda Nikolayevi tutmayıblar. Ona görə də mən hesab edirəm ki, sübut sözün əsl mənasında hər gün gördüyünüz nəticələrdir”.

Eyni zamanda Kirbi qeyd edib ki, bu müharibənin nə vaxt bitəcəyini dəqiq proqnozlaşdırmaq mümkün deyil:

"Putin düzgün addım atsa, bu gün bitə bilər: qoşunları çıxarın, onları evə göndərin və Ukraynanın suverenliyinə hörmət edin. Lakin o, başqa yol seçdi".