NATO-nun baş katibi Yens Stoltenberq jurnalistlərə bildirib ki, NATO Finlandiya və İsveçə üzvlük üçün müraciət etmək qərarına gəlsə, onları tez bir zamanda qəbul etməyə hazırdır.

Brüsseldə mətbuat konfransında danışan baş katib, üzvlük üçün müraciət edib-etməməyin hər bir ölkənin öz ixtiyarında olduğunu deyib. O bildirib ki, lakin bunu seçsələr, "NATO onları qolları açıq qarşılayacaq".

Stoltenberq bildirib ki, Finlandiya və İsveç müraciət edərsə, rəsmi qoşulma prosesi "tez olacaq".

O, əlavə edib ki, NATO hərbi alyansı müraciət və rəsmi ratifikasiya dövründə hər iki ölkəyə dəstək verəcək.

NATO rəhbəri jurnalistlərə bildirib ki, günün sonunda Finlandiya prezidenti Sauli Niinisto ilə danışmağı planlaşdırır.

Qeyd edək ki, Finlandiya ilə 1 340 km quru sərhədi olan Rusiya, Finlandiyanın NATO-ya üzv olmaq istəyinin reallaşacağı təqdirdə, öz tədbirləri ilə "vəziyyəti yenidən tarazlaşdırmalı" olacağını bildirmişdi.