Şənbə günü Lipetsk şəhərində pensiya yaşının 120 ilə qaldırılması təklifi ilə mitinq keçiriləcək. Aksiyanın təşkilatçısı Aleksandr Qriqoryev bildirib ki, əslində, mitinqin belə şüarı bir sarkazmdır.
«Aksiya Putinin pensiya islahatına dəstək verilməsinə və Rusiya vətəndaşlarının pensiya yaşının 120 ilə qaldırılmasına həsr olunub. Mitinqi ona görə keçiririk ki, bizim hakimiyyətin iyrənc mahiyyətini açıb göstərək» – deyə, təşkilatçı dəqiqləşdirib.
Qriqoryev danışıb ki, hakimiyyət mitinqin Böyük Pyotr meydanında keçiriməsinə razılıq verib.
«Mitinqdə ondan danışıcaqlar ki, 120 il  həddindən artıq çoxdur. Və 65 il də real müddət deyil – ölkədə pensiya islahatı aparılmalı və qadınlar üçün pensiya yaşı 45 illə, kişilər üçün 55 ilə endirilməlidir. Bax, bu – ədalətli olacaq» – Qriqoryev izah edib.
Qeyd edək ki, Aleksandr Qriqoryev Lipetskdə sistemsiz müxalifətçi kimi tanınır. 2015-ci ildə o, şəhər meri postuna namizədliyini irəli sürüb. 2018-ci ildə isə vilayət administrasiyasında «şərin qovulması» simvolik mərasimini icra edib.
Məlumdur ki, ötən il Azırbaycan hökuməti də bir daha Rusiyanın «quyruğunda süründüyünü» ortaya qoydu və ölkədə rusların «pensiya islahatı»nı təkrarladı – kişilər və qadılar üçün pensiya yaşını mərhələlərlə 65-ə qaldırmaq haqqında qərar verdi. Hazırda kişilər üçün pensiya yaşı 64-ə, qadınlar üçün isə 61-ə qaldırılıb.
Üstəlik də on minlərlə ahıl vətəndaşı pensiya hüququndan məhrum etmək məqsədilə, yeni «qanun»a 25 illik bir «əmək stajı senzi yamadı». Ancaq, Rusiyadan fərqli olaraq, «dözümlü» Azərbaycan xalqı etirazlara  çıxmadı. Ancaq pensiya “islahatının” nəticəsi bir müddət sonra ortaya çıxacağından, həmin vaxt  «şok»dan ayılan qocalar etirazlarını açıq ifadə edə bilərlər!
Ona görə də, hökumətin bu qərarınını yenidən nəzərdən keçirməsi daha doğru olardı.
Qəribə ölkədir Azərbaycan – bir yandan məmurlar ölkəni talayır, milyardları xaricə daşıyır. O biri yandan hökumət «Hadıkimilər»in əli ilə qocaların almalı olduğu pensiya məbləğindən «qənaət» etdiyi vəsaiti dövlət büdcəsinin «cırıq kisəsi»nə toplamaq yolunu tutub. Hansı ki, «qənaət» edilən vəsait məmurların taladığı pulların cüzi bir hissəsi belə etmir… Afərin!
Mən isə deyirəm: 
Səs salma, qoy millət hələ yatsın, 
Razı deyiləm yatmışları kimsə oyatsın!
 


Paylaş: