Rusiya ilə Ukrayna arasında müharibənin davam etdiyi bir vaxtda Türkiyə prezidenti Ərdoğan bu gün Qazaxıstanın paytaxtı Astanada Rusiya prezidenti Putinlə görüşəcək. İkilinin görüşünə saatlar qalmış Rusiya mətbuatı mümkün görüş mövzularını açıqlayıb, Kreml də bu haqda açıqlama verib.

Rusiya Federasiyası Prezidentinin köməkçisi Yuri Uşakov Rusiya mətbuatına açıqlamasında Ərdoğandan “vasitəçilik” təklifini gözlədiklərini bildirib. Uşakov deyib ki, Ərdoğan Putinə mümkün Rusiya-Qərb danışıqlarının formatları ilə bağlı təkliflərini rəsmi şəkildə təqdim edəcək.

“Hazırda mətbuatda yer alan fikirləri Ərdoğanın rəsmi şəkildə təqdim etməsini gözləmək olar. Çünki Rusiya, ABŞ və Qərbi Avropanın aparıcı dövlətləri də daxil olmaqla, müxtəlif vasitəçilik planları gündəmdədir”, – Uşakov deyib.

Ötən gün Kremlin sözçüsü Dmitri Peskov isə "Putin və Ərdoğan Türkiyənin Rusiya-Ukrayna görüşünə ev sahibliyi etmək təklifini müzakirə edə bilərlər" deyib.

Qazaxıstanın paytaxtı Astanada açıqlama verən prezident Ərdoğan "Məqsədimiz axan qanı ən qısa zamanda dayandırmaqdır" deyib.

Birləşmiş Millətlər Təşkilatı da, Ərdoğan-Putinin görüşünün taxıl sazişinin tarixinin uzadılması və genişlənməsinə töhfə verməsini ümid edir.