Xarici işlər naziri Ceyhun Bayramov ATƏT-in Nazirlər Şurasının Polşada keçirilən 29-cu iclası çərçivəsində Türkiyə xarici işlər naziri Mövlud Çavuşoğlu ilə görüşüb.

XİN başçıları Azərbaycanla Türkiyə arasında ikitərəfli və regional əməkdaşlıq gündəliyinin aktual məsələlərini müzakirə ediblər.

Nazirlər həmçinin ATƏT-in Nazirlər Şurasının 29-cu iclasında və çoxtərəfli platformalarda əməkdaşlıq, eləcə də qarşılıqlı maraq doğuran digər məsələlər ətrafında fikir mübadiləsi aparıblar.

Görüşün “kod”larını "Sherg.az"a açan Sosial Tədqiqatlar Mərkəzinin mətbuat xidmətinin rəhbəri, beynəlxalq məsələlər üzrə ekspert Əziz Əlibəyli vurğulayıb ki, iki ölkə də həssas dönəmdən keçdiyi üçün məsləhətləşməyə ehtiyac var:

"Türkiyə Suriyada, Azərbaycan isə Qarabağda antiterror əməliyyatlarına başlamağı planlaşdırır. Hazırda hər iki dövlətin bundan daha vacib mövzusu yoxdur.

Ona görə də, bu məsələdə dərhal beynəlxalq aləmdə və dövlətlərlə münasibətlərarası kontekstdə mövqeləri uzlaşdırmağa ehtiyac var. Yəni dərhal qərar vermək lazımdır. Çavuşoğlu və Bayramovun bu səbəblə görüşdüyünü ehtimal edirəm".

Görüşün ATƏT-in iclasında baş tutmasına gəlincə, ekspert qeyd edib ki, Azərbaycan bu təşkilatlara Avropa regional siyasəti prizmasından yanaşır:

"Artıq ATƏT-in heç bir önəmi qalmayıb. Avropada təhlükəsizliklə, əməkdaşlıq qayğıları birmənalı şəkildə təmin olunmur və ideya özünü doğrultmadı. Yəni bu təşkilata soyuq müharibə dövründə, isti savaşdan qaçmaq üçün vasitələrdən biri kimi baxılırdı. Lakin baş tutmadı. Azərbaycanın nazirlər şurasının 29- cu iclasında iştirak etməsi isə ümumavropa düşüncəsinin tədqiqi, son trendləri bilmək və orada əks mövqedə çıxış edənlərin cavabını vermək məqsədi daşıyır. Bu səbəblə də həmin kontekstdə ən maraqlı hadisə Azərbaycan və Türkiyə XİN başçılarının görüşüdür".