Böyük Britaniyanın Baş naziri Rişi Sunak vergi qalmaqalı fonunda müstəqil araşdırmadan sonra portfeli olmayan nazir, Mühafizəkarlar Partiyasının sədri Nadim Zahavini vəzifəsindən azad edib.
Bu barədə Sunakın Zahaviyə göndərdiyi məktubda deyilir.
"Keçən il baş nazir olanda söz vermişdim ki, rəhbərlik etdiyim hökumət bütün səviyyələrdə vicdanlı, peşəkar və hesabatlı olacaq. Məhz buna görə də, son günlər sizin şəxsi maliyyə işləriniz və bəyannamələrinizlə bağlı yeni məlumatların ortaya çıxmasından sonra mən Nazirlərin Maraqlar üzrə Müstəqil Müşaviri Ser Laurie Maqnusdan bu işi diqqətlə araşdırmağı xahiş etdim", - Sunak məktubda bildirib.
"Siz istintaqla razılaşdınız və onunla tam əməkdaşlıq etdiniz. Nəticələri hər ikimizə bildirilən Müstəqil Vəkilin araşdırması yekunlaşdıqdan sonra aydın oldu ki, bu, nazirliyin davranış kodeksinin ciddi şəkildə pozulmasıdır. Nəhayət, sizi Əlahəzrət Hökumətində vəzifədən uzaqlaşdırmaq qərarına gəldiyim barədə məlumat verirəm”, - Baş nazir əlavə edib.
Qeyd edək ki, Zahavi bu yaxınlarda həmtəsisçisi olduğu “YouGov”dakı payının satışından əvvəl ödənilməmiş vergilərə görə təxminən 1 milyon funt sterlinq məbləğində cərimə ödəməli olub. Nazirin özü yanvarın 21-də deyib ki, o, səhv edib və indiki kabinetdə vəzifə almadan əvvəl vergi xidməti ilə bütün mübahisələri həll edib.