“ABŞ dövlət katibinin iştirakı ilə Azərbaycan və Ermənistan liderlərinin görüşü keçirilib. Yəni ikitərəfli razılaşma baş tutmadığı üçün ABŞ vasitəçiliyi öz üzərinə götürdü”.

Bunu politoloq Fərhad Məmmədov deyib.

F. Məmmədov qeyd edib ki, Brüssel formatının bərpasına əminlik var:

“Azərbaycan prezidenti üçtərəfliliyi vurğuladı. Amerikalılar üçün Brüssel formatı vacibdir, çünki o, ABŞ-ın təşəbbüslərini tamamlayır. Amma fransızların sakitləşəcəyini söyləmək olmaz”.

Politoloqun fikrincə, sülh müqaviləsi istiqamətində proses davam edir:

“Əminəm ki, Bakı mətnin növbəti redaktə edilmiş variantını çox yaxın vaxtlarda təhvil verəcək və xarici işlər nazirləri səviyyəsində görüş tələb edəcək. Burada iki məqsəd var: ya sülh müqaviləsinin imzalanmasını yaya qədər gözləyin, ya da vasitəçilərə Ermənistanın konstruktiv olmadığını və mümkün olan hər şeyin edildiyini göstərin”.

F. Məmmədov diqqətə çatdırıb ki, keçid məntəqəsi ilə bağlı da maraqlı yanaşma müşahidə olunur: “Azərbaycan prezidenti bu mövzuya konstruktiv yanaşdı: istər Zəngəzur dəhlizində, istərsə də Laçın yolunun girişində nəzarət-buraxılış məntəqələri olmalıdır. Başqa sözlə, bu, Rusiyanın üçtərəfli bəyanatların icrasını təmin edə bilməyəcəyinin etirafıdır.

Ermənistan keçid məntəqəsi tələb edir. Laçında da keçid məntəqəsi olacaq. Ermənistan bu halda yola nəzarət funksiyasını necə edəcək? Rus sərhədçiləri olmalıdırmı?

Məncə, Ermənistanın baş naziri öz ərazisində Rusiyanın hansısa funksiyanı təmin etməsini istəmir. Bu, Paşinyan üçün Qərbə inteqrasiya baxımından zərərlidir. Azərbaycan bu təkliflə əslində Rusiya ilə münasibətlərdə Ermənistanı seçim qarşısında qoyur”.

Politoloq qeyd edib ki, son 6 ayda Rusiya qeyri-adekvat addımlar atıb, Qarabağda konstruktiv mövqe nümayiş etdirmək əvəzinə təxribat yolu tutub:

“Rus icması yaradıldıqdan sonra daha da irəli getdilər, “Vardanyan layihəsi”nə üstünlük verdilər. Nəticədə nə əldə etdiniz? Ekoaksiya və yoldakı məhdudiyyətlər. Üstəlik, Avropa İttifaqının Ermənistandakı missiyası və Ermənistan-Rusiya münasibətlərindəki problemlər”. //Reyting.az//