“Nə edərlərsə etsinlər, planımız, tutduğumuz yol üzərində işləməyə davam edirik”.

Bunu Türkiyə Prezidenti Rəcəb Tayyib Ərdoğan, İYİ partiya sədri Meral Akşenerin “altılı masa” ilə bağlı dünənki açıqlamasını dəyərləndirən zaman deyib.

“AK Partiya olaraq onlar nə deyərlər, nə edərlər, bizim belə bir narahatlığımız yoxdur. Xalq Alyansı olaraq hədəfimizi müəyyən etmişik”, - Türkiyə Prezidenti əlavə edib.

Xatırladaq ki, “altılı masa”da prezident seçkilərinə vahid namizədin müəyyən edilməsi ilə bağlı müzakirələr keçirilib. 5 partiya namizəd olaraq Cümhuriyyət Xalq Partiyasının (CHP) sədri Kamal Kılıçdaroğlunu təklif edib. Bu partiyalar Kılıçdaroğlunun namizədliyini dəstəkləsə də, İYİ partiya Ankara Böyük şəhər Bələdiyyəsinin sədri Mansur Yavaş və İstanbul Böyük şəhər Bələdiyyəsinin sədri Əkrəm İmamoğlunun namizədliyini irəli sürüb. Digər partiyalar həmin şəxslərin namizədliyini qəbul etməyib. Danışıqlardan narazı qalan M.Akşener partiyasının “altılı masa”nı tərk etdiyini açıqlayıb.