Türkiyə Prezidenti Rəcəb Tayyib Ərdoğan Türkiyə hökməti ilə Azərbaycan hökuməti arasında Türkiyə Respublikasının Kahramanmaraş vilayətində yaşayış binaları, ibtidai məktəb, uşaq bağçası və mədəniyyət mərkəzinin tikilməsi haqqında əməkdaşlıq sazişini təsdiqləyib.

Bu barədə “Rəsmi Gazete”də qərar dərc olunub.

Sazişə əsasən, Azərbaycan hökuməti layihənin reallaşması üçün 100 milyon ABŞ dolları ayıracaq.

Layihə, 6 fevral 2023-cü il tarixində Türkiyədə baş verən zəlzələdən zərər çəkmiş Kahramanmaraş vilayətində təcili sığınacaq ehtiyacını qarşılayacaq.

Sənəd 2 il müddətinə qüvvədə qalacaq.

Qeyd edək ki, sözügedən saziş 25 sentyabr 2023-cü il tarixdə Naxçıvanda imzalanıb.

Xatırladaq ki, bu ilin fevralın 6-da Türkiyənin cənub-şərqindəki Kahramanmaraş vilayətində 7,7 və 7,6 bal gücündə iki zəlzələ olub.

Yeraltı təkanlar ölkənin 11 əyalətində və qonşu dövlətlərdə hiss olunub. Türkiyə hakimiyyəti zəlzələni “əsrin fəlakəti” adlandırıb. Təbii fəlakət nəticəsində Türkiyədə 50,5 min nəfər ölüb.