“Qərb nümayəndələri arasında Donald Trampın ikinci dəfə Amerika prezidenti olacağı təqdirdə ABŞ-ın Avropa və NATO-dan üz döndərə biləcəyi ehtimalı narahatlığa səbəb olub”.

Bu barədə “The New York Times” avropalı diplomatlara və ABŞ siyasətçilərinə istinadən yazıb.

Nəşr Şimali Atlantika Alyansının 74 ildir Amerika üçün ən mühüm hərbi ittifaq olduğunu bildirib:

“Hər iki partiyanın liderləri bunu ABŞ-ı gücləndirmək və qüvvələri birləşdirən bir vasitə kimi görüblər, lakin Tramp açıq şəkildə bildirir ki, o, NATO-nu Amerika resurslarını pulsuz istifadə edənlərin vasitəsi kimi görür. Son prezidentliyi dövründə o, dəfələrlə Alyansı tərk etməklə hədələyib.

İndiyə qədər keçmiş lider bu məsələ ilə bağlı planlarından demək olar ki, danışmayıb. Lakin onun seçkiqabağı internet saytında müəmmalı bir cümlə var: “Biz NATO-nun məqsəd və missiyasının əsaslı şəkildə yenidən qiymətləndirilməsi üçün mənim rəhbərliyimlə başladığımız prosesi başa çatdırmalıyıq”. Qeyri-müəyyənlik Avropada və daxildə ABŞ-ın ənənəvi xarici siyasət tərəfdarları arasında narahatlıq yaradıb”.

Nəşrin müəmmalı planla bağlı şərh istəməsinə cavab olaraq Tramp daha bir mübahisəli bəyanat yayıb:

“ABŞ-ın hər bir prezidenti Amerikanın alyanslarının Amerika xalqının qorunmasına xidmət etməsini və Amerikanın qanını və xəzinəsini ehtiyatsızlıqdan təhlükəyə atmamasını təmin etmək üçün məsuliyyət daşıyır”.

“Trampın mümkün seçki qələbəsi fonunda şübhə yaradan məqamlar arasında Ukraynaya yardım da var. Bu məsələ 2025-ci ildə xarici siyasət böhranını təhrik edən ilk məsələlərdən biri ola bilər”, - nəşr bildirir.