ABŞ-nin Moskvadakı səfiri Lin Treysi Rusiya Xarici İşlər Nazirliyinə (XİN) çağırılıb.

TASS xəbər verir ki, bu barədə Rusiya Xarici İşlər Nazirliyinin saytında yerləşdirilən məlumatda qeyd edilib.

Məlumata görə, ona üç Amerika QHT-sinin (“Amerika Beynəlxalq Təhsil Şurası”, “Mədəniyyət Perspektivləri” və “Beynəlxalq Təhsil İnstitutu”nun) arzuolunmaz təşkilat kimi tanınması barədə məlumat verilib. Həmçinin, səfirə bu QHT-lərə hər hansı yardımı dayandırmağı tələb edən nota verilib.

Əlavə olunub ki, yardım davam edərsə, Rusiya qanunvericiliyinin pozulması kimi qiymətləndiriləcək, həmçinin diplomatik nümayəndəliyin rəsmi saytından və sosial şəbəkələrdən bu QHT-lər tərəfindən həyata keçirilən və Rusiya cəmiyyətinə yad münasibət və dəyərlərin təbliğinə yönələn təhsil layihələrinin və proqramlarının siyahısı silinəcək.

Xüsusilə vurğulanıb ki, Rusiyanın daxili işlərinə qarışmaq cəhdləri, o cümlədən seçkilər və xüsusi hərbi əməliyyatlar kontekstində təxribat xarakterli hərəkətlər və dezinformasiyaların yayılması bu cür hərəkətlərdə iştirak edən ABŞ Səfirliyinin əməkdaşlarının persona non qrata kimi deportasiyası daxil olmaqla, sərt və qətiyyətlə dayandırılacaq.